"Vulissi Turnari Nicuzzu"

"VULISSI TURNARI NICUZZU"

MI SENTU LU CORI MALATU

E SEMPRI DI SPINI PUNCIUTU;

MI SENTU MANCARI LU CIATU

E, SULU, MI SENTU PIRDUTU.

VULISSI TURNARI NICUZZU,

AVIRI CARIZI E VASATI,

JUCARI CU LU CAVADDRUZZU

E COMU DDI TEMPI PASSATI!

AVIRI A ME' NANNA VICINU

CHI CUNTA LI CUNTI DI FATI,

JUCARI NTA LU ME JARDINU

MANCIANNU CU L'ATRI SUDDATI.

VIDIRI LU MUNNU E LI GENTI

CU L'OCCHI E CU L'ANIMU PURI

CHI MANNANU ODURI DI CIURI.

E CURRIRI, CURRIRI, CURRIRI

DARRENI DUMILA FARFALLI

CAMPAGNI-CAMPAGNI, AFFIRRARI

JUCARICI E POI MBARSAMALLI.

JUCARI, SCIARRIARIMI, CURRIRI,

E LIBERU ESSIRI FORA,

AVIRI DI SUTTA NA TAVULA

PI FARI LA SCIDDICALORA.

SCIALARI A LA CAZZICATUMMULA

E CENTU CUMETI ABBIARI,

O PURU JUCARI A LA STRUMMULA,

CANTARI, JUCARI, SCIALARI.

ARRENI TURNARI NICUZZU

C'UN CORI AMURUSU E SINCERU.

ME MATRI CHI DICI "CIATUZZU,

CHI CAMPI FELICI IU SPERU"

VULISSI ACCUSSI RITURNARI

DURMENNU A ME MATRI ABBRAZZATU:

PI SENTICI ANCORA CANTARI

"MI DORMI LU FIGGHIU ADORATU!"

MA NO, LU PASSATU NUN TORNA,

UN SONNU DUCISSIMU FU':

VIRRANNU FILICI LI JORNA ,

MA CHIDDI NUN TORNANU CCHIU'!

Vincenzo Licata

Niente da aggiungere, solo parole, solo poesia.